Month: September 2018
Carpe Diem
Aatma Ki Lau
Ek kanpkapi hai mere andar, jo bahaar aane ko hamesha taiyaar rehti hai
Chaar Sau ho ya Chaalis kitne bhi log ho mere saamne,
Wo daayein pair tak apna rasta khoj hi leti hai
Shabdon pe taala laga deti hai,
Gale se paani sukha kar peshaani pe le aati hai
Shareer dheere dheere thanda padne lagta hai
Thik ussi waqt aatma main ek lau jalti hai,
Yeh lau shareer main aaye toofan se ladti hai
Aur shabdon ke taale ko pighaal deti hai
Peshaani ka paani udd jaata hai
Gale main pighaala hua woh rass pahunch jaata hai
Daayein pair ki kanpkapi tham jaati hai
Aur aatma ek baar phir yeh yudh jeet jaati hai…
MaaNama #1
Iss baar jab apne sheher jaunga toh
Maa ki aankhon se chamak chura laaunga,
Taaki bade sheher ki iss andhere akelepan main
Thoda kam darr lage…
Ek din main baithe baithe soch raha tha
Bhagwaan ko ‘yaar’ bolun ya ‘vyapaar’…
Maa ne sar pe tapli maari aur kaha,
‘Pyaar’ bol ‘Pyaar’…
Dil Roshan, Raah Roshan
